Oia acolle a partir do próximo luns a Semana sobre Especies Invasoras 2022
Galicia Ambiental e o Concello de Oia realizarán actividades para sensibilizar sobre a necesidade de afrontar o problema das especies invasoras, concretamente da Cortaderia selloana
A Semana sobre Especies Invasoras (SEI) 2022 chega ao municipio de Oia o próximo 23 de maio da man da Asociación Galicia Ambiental e do Concello da vila pontevedresa. Durante a semana realizaranse diversas charlas e actividades de sensibilización sobre este problema ambiental, concretamente da presenza da herba da pampa (Cortaderia selloana). Galicia Ambiental advirte da necesidade de afrontar acción de loita e sensibilización cidadá fronte as especes invasoras, pois son unhas das principais ameazas para a biodiversidade a nivel global. Malia todo, esta cuestión é descoñecida para a maior parte da cidadanía, polo que é importante desenvolver accións de control e concienciación.
Tras un parón obrigado polas medidas preventivas para o control da pandemia, a Asociación Galicia Ambiental retoma as súas actividades con voluntariado e os seus programas de educación e sensibilización ambiental. Así, esta primeira acción é en colaboración co Concello de Oia, sendo ambas entidades adheridas ao proxecto LIFE Stop Cortaderia. Ademais, Galicia Ambiental é “socio rexional” na candidatura para optar a un novo proxecto STOP Cortaderia presentado ao novo LIFE e que comezará a executarse o próximo ano. Cabe destacar que, durante 2022, a asociación desenvolve diferentes accións de voluntariado para a extracción de especies invasoras dentro do seu programa SIN INVASORAS. A entidade considera esta acción de Oia como un “programa piloto” das invertencións locais que se desenvolverán, no caso de ser aprobado, dende 2023 no marco do II Programa Stop Cortaderia, do cal forma parte en representación de Galicia.
Programación de actividades
Durante a Semana sobre Especies Invasoras (do 21 ao 29 de maio) organizaranse charlas durante diversos días nos centros escolares e asociacións do municipio de Oia, culminando cunha acción de voluntariado. Así, o luns 29 terá lugar unha charla no CEIP Mestre Manuel García (das 13:00h ás 13:50h para os cursos de 5º e 6º e de 13:50h a 14:40h para os cursos de 3º e 4º); o xoves 26 realizarase unha charla no CEIP Refoxos (ás 12:00h para Primaria e ás 13:00h para Infantil); e o sábado 28 está previsto un coloquio sobre especies invasoras coa veciñanza no concello de Oia, ás 10:30h.
Por outra banda, o domingo 29 terá lugar unha acción de voluntariado de extracción xeralizada de plumeiros e cartografado de plantas a carón do Camiño Portugués a Santiago. A actividade, que comezará ás 11:00h no Camiño de Barcelos (reunión no camping O Muíño, Parroquia de Mougás) consistirá en percorrer por equipos o termo municipal cun dobre obxectivo: extraer semente e cartografar a presenza da planta a través da plataforma habilitada polo proxecto LIFE Stop Cortaderia. Nela figura unha boa parte das plantas tras unha intensa identificadora desenvolvida dende o municipio, un dos máis activos nesta materia de Galicia. Esta xornada de voluntariado rematará coa entrega dun plumeiro novo para a súa destrución, que terá lugar nunha zona urbana do municipio onde se consolidaron varias plantas, converténdose nun espazo “liberado” de Cortaderia selloana e restaurado mediante a plantación de árbores autóctonas.
Semana sobre Especies Invasoras
Diferentes localidades de España e Portugal acollen do 21 ao 29 de maio máis de 150 actividades para concienciar á poboación do problema que supoñen as especies exóticas invasoras. Neste sentido, a Semana sobre Especies Invasoras pretende contribuír a aumentar o coñecemento e a sensibilización no tocante a estas especies. Trátase dunha iniciativa promovida pola Rede Portuguesa de Estudo e Gestão de Espécies Invasoras - Rede InvECO, pola plataforma Invasoras.pt e polos proxectos LIFE Stop Cortaderia e LIFE INVASAQUA. Ademais, realízase en estreita colaboración con diversas entidades, asociacións e grupos informais.
As especies exóticas invasoras son unha das principais causas de perda da biodiversidade no planeta. Ademais, tamén provocan a destrución dos hábitats e a explotación e contaminación directas de especies. Deste xeito, a colaboración entre entidades portuguesas e españolas para organizar eventos é imprescindible e, para afrontar o problema que supoñen estas especies, é esencial concienciar tanto en prevención como en xestión.